DAVAO CITY – Laing hugna na usab sa mobile vaccination batok COVID-19 ang gipahigayon sa Davao City Council.
Nahitabo kini sa Davao City Jail, diin 960 ka Persons Deprived of Liberty kon PDL ug Bureau of Jail Management and Penology ang nakadawat sa ilang first dose sa COVID-19 vaccine.
Gikan ang mga gipangbakunahang inmate sa Male Dormitory, Jail Annex, ug Ray of Hope sa nasangpit nga prisohan.
Mapasalamaton usab ang mga PDL sanglit nahatagan sila og higayon nga makapabakuna bisan pa man anaa sila sulod sa prisohan.
Usa lang kini sa mga hugna sa mobile vaccination nga gipaluyuhan sa Davao City Council aron tabangan ang lokal nga panggamhanan nga mapapaspas ang vaccine rollout sa Dakbayan, alang usab sa pagkab-ot sa herd immunity sa dili pa mahuman ang kasamtangang tuig.
Sa pikas bahin, nagpagula na og update ang Davao City Vaccination Cluster kalabot sa ihap sa mga nabakunahan sa Dakbayan as of September 25, 2021.
Anaa na sa 716,793 ang partially-vaccinated ug 583,002 ang fully-vaccinated na batok COVID-19 sa Dakbayan sa Davao.
