Patay ang sa ka minero human nga gipusil sa Sitio Anogkot, Brgy. Marayag, Lupon, Davao Oriental kaganihang buntag samtang nagsakay kini sa iyahang motorsiklo.
Subay sa inisyal nga impormasyon gikan sa kapulisan, nahitabo ang pagpamusil pasado alas 9 sa buntag.
Giila ang biktima nga si Ryan Malagdao Patuar, hamtong ang panuigon nga residente sa maong lugar.
Matod pa sa report, gipusil sa makadaghang higayon biktima nga sumala pa sa mga nakasaksi sa maong panghitabo adunay pito ka mga basyo sa bala ang narekober atol sa nahitabu-an.
Nasayran nga padulong unta sa Pamulawanan sa Araubo, Pantukan, Davao de Oro ang biktima. Sumala pa sa kapulisan sa RPSB Marayag, padayon ang imbestigasyon karong panahuna samtang nagpahigayon na og hot pursuit operation aron pangitaon ang suspetsado sa krimen.
Gipahimangnoan usab publiko nga magpabiling mag-amping ug alerto samtang nagpadayon ang imbestigasyon sa insidente.
Padayon usab nga gipanubayan ang maong kaso samtang ginatumbok ang motibo sa krimen.
Kahinumduman nga niadtong nakalabay nga semana usa usab ka minero ang nakabsan sa kinabuhi human gi-ambush, samtang angol usab ang kauban niini atol sa maong panghitabo sa sa Sitio Bongco, Barangay Calapagan, Lupon, Davao Oriental pasado alas 2:00 sa hapon.
Giila ang nakbsan sa kinabuhi nga si Perlito Flores,60 anyos, minero ug residente sa Lanao del Norte, samtang ang samdan mao si Jumie Masunag, 32 anyos, minero ug residente sa Panlaysan, Sangab Caraga, Davao Oriental.
Sa pagkakaron, nagpadayon pa ang gihimong imbistigasyon sa kapulisan sa maong panghitabo, samtang una nang gidudahan nga tulis ang motibo sanglit nawala ang dalang bulawan og kwarta sa mga biktima.
