DAVAO CITY – Laoman nga magpadayon pa gihapon ang pagbakuna dinhi sa dakbayan sa Davao dungan sa pag-abot nga kagahapong adlawa sa 44,800 pa ka mga Sinovac CoronaVac vaccines nga gitagana alang sa Davao region.
Una ng nasayran sa Department of Health nga mikabat na karon sa 432,050 doses ang nadawat sa rehiyon sukad nga gisugdan ang pagbakuna kaniadtong Marso ning kasamtangan nga tuig.
Sama sa naandan, gidiretso gilayon ang mga miabot nga bakuna sa cold room sa Department of Health (DOH)-Davao Region dungan sa pag-abot niini kagahapong adlawa sa Francisco Bangoy International Airport.
Una ng gibutyag ni DOH-Davao Director Annabelle Yumang gihan-ay na sab ang bakuna alang sa pagtunga niini sa Davao Oriental.
Sa kasamtangan, padayon ang pagbakuna sa mga anaa sa Priority A1, A2, ug A3 groups sa rehiyon ug kung magpadayon ang pag-abot sa dugang supply sa mga bakuna, posibleng masugdan gilayon ang pagbakuna kadtong anaa na sa A4.
Una ng gibutyag ni Mayor Sara Duterte-Carpio nga adunay mga bakuna nga gi-order ang siyudad ug laoman nga moabot kini sa third quarter ning tuig kasamtangan.
