DAVAO CITY – Nagpadayon karon ang pagdawat ug reklamo sa gimugnang Kean Gabriel Hotline sa lokal nga panggamhanan kini human nga laing bata na sab nga biktima sa pagpangabuso ang ilang naluwas.
Kahinumduman nga ulahing naluwas sa Quick Response Team on Children’s Concerns (QRTCC) ang usa ka sais anyos nga batang lalaki gikan sa iyang abusadong amahan nga pipila ka higayon na sab nga nasikop sa otoridad.
Matud pa sa Social Worker nga si Teresita Obang nasayran nila ang kahimtang sa bata human ang pagtawag sa nahisgutan nga Hotline nga gimugna kaniadtong milabay nga tuig human ang kamatayon sa usa ka tres anyos nga bata nga gikulata hangtud nga namatay sa iyang stepfather.
Dugang ni Obang nga dihang miabot sila sa pinuy-anan sa biktima, gisulayan pa pagtabon sa amahan ang mga samad sa bata nga gituohang gibunalan gamit ang wire sa kuryente.
Nagsilbi na sab nga pagpamatuod ang testimonya sa inahan sa bata diin napasakita sumala pa kini human nga naligo ug ulan.
Gikanayong lango sa ilimnong makahubog ang amahan sa bata dihang gihimo ang pagpanakit.
Gibalhug karon sa presohan ang suspek ug gipasakahan ug kasong physical injury ilalom sa Republic Act 7610 o Child Abuse Law.
Laing reklamo sab ang gipasaka batok sa inahan sa biktima gumikan kay wala niini gi-report sa otoridad ang maong pagpangabuso.
Nakadesisyon sab ang City Social Welfare Office (CSWO) nga ipabilin sa ilang kustodiya ang bata human nga ilang nasayran nga sagad sab kini nga biyaan sa iyang mga ginikanan sa ilang panimalay nga nag-inusara.
