Gisugyot ni kanhi Deputy Speaker ug Buhay partylist Rep. Lito Atienza ang pagpabalik sa kultura ug sports sa Department of Education (DepEd).
Matod pa sa nahisgutan nga dinhi nagsugod ang kalihukan sa sports ug kultura ug pakusgan gikan sa grassroots ang mga pampublikong tulunghaan ug komunidad.
Dugang pa sa tinubdan, ang pagtanggal sa kultura ug sports sa DepEd ang walay nahatag nga kaayuhan gumikan kay nagdako ang mga batang Pilipino nga walay kasayuran, ilabi na sa kultura. Kung kahinumduman, kanhi Department of Education, Culture and Sports (DECS) apan giwagtang ang kultura ug sports hinungdan nga gihimo kining DepEd.
Karon lamang niini namatikdan ang negatibong epekto niini sa mga kabatan-unan, hinungdan nga angay kini ibalik gumikan kay milyon-milyong mga kabus nga Pilipino ang midako sa mga pampublikong tulunghaan nga walay kasayuran sa kultura, ug wala usab nakakuha ang mga nahisgutan sa pagbansay-bansay sa sports nga mamahimong ibalik ang Pilipinas sa kalbutan niini sa natad sa mga maayong atleta.
Daghan usab sa mga kabatan-unan ang napadulong sa droga ug juvenile delinquency gumikan kay nawala ang kultura ug sports sa mga tulunghaan.
