DAVAO CITY – Nanawagan karon ang kowalisyon sa mga human rights groups, people’s organizations, ug non-government organizations sa mga kongresista aron nga ibasura ang pagbuhi sa silot kamatayon sa nasud ug awhagon ang gobyerno nga han-ayon na lamang ang justice system.
Matud pa kang Jo Moso, sa iDefend Davao coalition, nga ang mga miyembro sa House of Representatives dili angayan nga magpadala sa pressure nga gipatuman ni Davao del Norte Rep. ug House Speaker Pantaleon Alvarez nga nagbahad nga tangtangan ug committee chairmanship sa higayon nga dili moboto sa subling pagbuhi sa death penalty.
Nanawagan si Moso sa mga legislators nga paminawon ang ilang konsensiya ug tumanon ang prinsipyo ug dili ang tingog sa “supermajority” sa kamara nga kaalyado ni Pangulong Rodrigo Duterte.
Gibarugan ni Moso nga ang capital punishment dili solusyon aron makunhuran ang krimen sa nasud inay mas maayo sumala pa nga han-ayon na lamang judicial system aron mapugngan ang mga corrupt nga prosecutors.
Nasayran nga ang nahisgutan nga kowalisyon gilangkuban sa Task Force Detainees of the Philippines, Kilusan Para sa Kilusang Demokrasya, Partido Manggagawa, Sentro, ug Freedom from Death Coalition nga una ng nagpahigayon ug lihok protesta aron nga ipanawagan sa mga magbabalaud nga ibasura ang nahisgutan nga sugyot.
