Angol ang usa ka drayber sa kotse human nga nabangga kini sa usa ka Wing Van kaganihang kaadlawon. Subay sa report sa kapulisan, giila ang biktima nga si alyas Joe nga residente sa alyas Joe nga residente sa Misamis Oriental. Samtang ang drayber sa Wing Van, giila nga si alyas Joel.
Subay sa gipahigayon nga imbistigasyon, pasado alas Dos ang takna kaganihang kaadlawon, nahitabo ang panagbangga sa Subaru Sedan ngadto sa Wing Van sa Purok 5, Barangay Gumalang, Baguio District, ning dakbayan sa Davao.
Dugang pa sa gihimong imbistigasyon sa mga otoridad, igo lamang nga nag-park sa pikas nga direksiyon diin gilatas sa kotse nga nakabangga. Sumala pa, kalit nga miliko ang kotse nga gimaneho sa biktima nga si Joe nga miresulta kini sa pagkabangga sa trak hinungdan sa pagkaangol sa biktima ug pagkaguba sa sakyanan.
Gumikan sa maong panghitabo, dali nga girespondehan sa mga rescuers sa Central 911 ug gidala sa Davao Doctors Hospital ang naangol nga biktima. Sumala pa sa mga otoridad nga nakatagpilaw ang drayber sa kotse nga maoy hinungdan nga nabangga kini sa naka-parking nga sakyanan.
Apan sumala pa sa mga otoridad nga mag-atubang gihapon og salaod ang drayber sa Wing Van tungod ginadili ang pagparking sa daplin sa karsada ilabi na sa mga national highway.
