DAVAO CITY – Gibuhi-an na kapolisan sa Sta. Cruz PNP ang usa ka Korean National nga gika-ingong nahilambigit sa pagkabangga ug pagkapatay sa usa ka hamtong nga lalaki.
Una nang naila ang biktima nga usa ka Delfin Lopez Bacaling, 64 anyos, residente sa Sta. Cruz, Davao del Sur.
Kahinumduman nga pasado alas 9:30 ang takna sa kabuntagon, samtang ang biktima kuyog ang iyang asawa nagbitbit ug gabas, gumikan kay magpanday kini, apan samtang nagbaktas daplin sa karsada, kalit na lamang kini nga gibangga-an sa naghaguros nga Hundai Starex Van nga gimaneho ug gipanag-iya sa usa ka Korean national nga Ban Shuli, 44 anyos, temporary nga nanimuyo sa Datu Compound, Barangay Zone 1 sa dakbayan sa Digos City.
Gi-deklara nga patay ang biktima sa paghi-abot sa Davao del Sur Provincial Hospital, samtang ang Korean national gi-imbestigahan sab sa kapolisan.
Nagkasabot ang pamilya sa biktima ug ang Koreano nga ang suspek ang mo-abaga sa galastohan sa pagpalubong sa napatay.
Kini ang nag-una nga hinongdan nga temporaryo lamang una nga gihatagan sa iyang kagawasan ang Koreano gikan sa poder sa Sta. Cruz PNP.
