DAVAO CITY – Gilauman nga saksihan sa bagang dout sa katawhan ang konsyerto nga ipahigayon dinhi sa dakbayan sa Davao karong adlawa alang sa mga apektado sa gubat sa dakbayan sa Marawi.
Hugtanon nga seguridad ang ipatuman atol sa konsyerto nga gitawag ug “One Love One Mindanao Help Marawi” karong adlawa, Hunyo 12 sa Rizal Park o atol sa mismo sa kasaulogan sa adlaw sa kagawasan diin tumong niini nga tabangan, pinaagi sa donasyon ang mga apektadong residente sa halos tulo ka semana na nga gubat sa dakbayan sa Marawi.
Una nang nag-awhag si Hope Hernandez, usa sa mga organizers sa konsyerto, ngadto sa publiko nga unta makighiusa sa ilang inisyatibo sa pagkolekta ug donasyon alang sa mga evacuees lakip na sa mga natanggong gumikan sa nagpadayon nga gubat.
Gi-awhag sa nahisgutan ang mga mosaksi sa konsyerto nga magdala ug donasyon sama sa pagkaon, senina ug medical assistance.
Samtang sa monetary donations, gipasalig sa nahisgutan ang transparency sa ilang makolekta ug misaad nga gamiton nila kini alang lamang sa mga biktima sa Marawi.
Gikanayong adunay ibaligya nga mga items ug merchandises diin 80 percent sa proceeds ang alang sa mga Marawi City evacuees.
