Ginatun-an na sa Bureau of Corrections (BuCor) ang posibilidad sa pagtugot sa mga indibiduwal nga nahukman ug lesser offenses nga serbisyohan ang sentensya niini sa ilahang pinuy-anan.
Gipahayag ni BuCor Director General Gregorio Catapang Jr., nga ang home imprisonment set-up ang gipatuman na sa ubang kanasuran sa Southeast Asia.
Una kini nga migawas sa ikaduha nga Association of Southeast Asian Nations (ASEAN) regional correctional conference nga gipahigayon sa Mimaropa ug gitambungan sa mga nagkadaiyang nasud.
Sumala pa ni Catapang, usa kini kapamaagi aron muluag ang mga prisohan ug matugutan ang mga indibiduwal nga nahukman ug minor offense nga makauban ang ilahang pamilya.
Mamahimo usab kini nga himuon sa Bureau of Jail Management and Penology nga adunay jurisdiction sa mga local jail alang sa mga detainee nga wala pa na-convict ug padayon pa gihapon nga gipailalom sa pagdungog ang ilahang mga kaso.
