Gisugdan na sa Office of the Ombudsman ang pag-imbestiga kon adunay nalapas ba nga balaod ang duha (2) ka kumpanyang may kalabotan sa solar energy nga gitukod ni Batangas 1st District Representative Leandro Leviste.
Sumala kang Ombudsman Jesus Crispin Remulla, sakop sa imbestigasyon ang Solar Philippines Power Project Holdings, Inc. ug ang subsidiary niini nga SP New Energy Corporation (SPNEC), lakip na ang nahitabong pagbaligya sa SPNEC shares ug ang relasyon sa duha ka kompanya.
Matod pa niya, posibleng mopahinungod og legal issues ang paghimo sa subsidiary human mapakyas ang pagbaligya sa parent company. Base sa mga rekord, gikan 2023 hangtod 2025, nakabaligya si Leviste og SPNEC shares nga nagkantidad og P22.259 bilyon ngadto sa MGEN Renewables, ang renewable energy arm sa Meralco PowerGen Corp. (MGEN).
Ang pahayag sa Ombudsman misunod sa anunsyo ni Energy Secretary Sharon Garin nga pahamtangan og P24 bilyon nga multa ang Solar Philippines, human nga gikansela ang labaw sa 11,000 megawatts nga power contracts sulod sa miaging duha ka tuig.
Gikansela ang maong mga kontrata tungod sa kapakyasan sa kompanya sa paghatod sa halos 12 gigawatts nga gisaad nga renewable energy capacity.
Gawas sa isyu sa pagbaligya sa shares, gibutyag usab ni Remulla nga mas halapad ang epekto sa giingong kapakyasan sa Solar Philippines sa paghatod og serbisyo sa energy sector sa nasud.
Dugang pa niya, posibleng mangayo og pagpasabot ang Ombudsman kang Leviste kon aduna’y igo nga basihanan aron pormal siyang kwestiyunon.
Sa usa ka miaging pakighinabi, gilimod ni Leviste ang iyang responsibilidad sa mga wala matuman nga power projects ug gipasabot nga dili ang Solar Philippines ang kompanyang iyahang gibaligya ngadto sa MGEN.
