DAVAO CITY – Gikumpirma sa usa ka opisyal gikan sa Department of Education (DepEd) XI nga suspendido ang tanang klase sa tanang lebel sa pampubliko ug pribadong tulunghaan sa Davao De Oro.
Kini dili gumikan sa transport strike apan gumikan kini sa nahitabong sagunson nga linog sa Davao De Oro karong adlawa. Sumala sa tigpamaba sa buhatan nga si Jenielito “Dodong” Atillo, nga anaa karon ang mga skwelahan sa Davao De Oro sa Alternative Learning Modulaties ug dili usa magpahigayon og face-to-face classes.
Kahinumduman, ang Davao De Oro ang nahimong sentro sa linog kaniadtong Pebrero 1, 2023, diin nakatala ang probinsya ug magnitude 6 nga linog. Ning kasamtangan, gikanayon ni Atillo nga nagpahigayon og inspection ang lokal nga panggamhanan sa probinsya kauban ang DepEd Engineers aron kumustahon ang sitwasyon sa mga establisyemento sa Davao De Oro.
Busa, nakahukom ang Provincial Government sa Davao De Oro nga suspendihon ang tanang klase sa lungsod ingon man nagpagawas og mando ang DepEd XI nga gilayong ibalhin usa ang klase ngadto sa Alternative Learning Modalities. Sumala ni Atillo nga kung ugaling dili makaya sa tulonghaan nga ibalhin ang klase sa online, gilayong ipatuman usa sa skwelahan ang modular scheme.
Dugang pa ni Atillo, nga giandaman na nila kini ug dili na sila maglisod. Ning kasamtangan, base sa talaan sa Philippine Institute of Volcanology and Seismology (PHIVOLCS), karong adlawa, miabot na sa kapin 30 ang nahitabong mga pagtay-og sa Davao de Oro diin pinakakusog niini ang natala kaganihang alas 4:43 sa kaadlawon diin aduna kini Magnitude 5.3 nga gikusgon ug sentro niini ang New Bataan.
