DAVAO CITY – Napusilan ang usa ka suspek nga nailhang si Jason Detros Lamaan, 20 anyos, lumulupyo sa Purok 13, Kasilak, Bucana, Barangay 76-A ning dakbayan sa Dabaw human nga nalambigit kini sa robbery hold-up sa Greenhills Street, San Rafael Village, Barangay 9-A ning dakbayan sa Dabaw.
Nadagit sa maong suspek ang mga alahas nga gilangkuban sa 3 ka bulawang singsing, 3 ka nga bulawang pulseras ug usa ka relo nga nagkantidad og Php 30,000; ug kwarta nga nagkantidad og Php 70,000.
Daling nagtago sa ngit-ngit nga bahin ang suspek diin gitiunan niini ang biktima nga usa ka 32 anyos nga babaye nga giilang si Julieta Bolivar Olloy, self-employed ug lumulupyo sa Purok 10, Barangay 39-D ning siyudad.
Atol sa gipahigayong pagpatrolya sa Police Station 2 sa San Pedro Police Station, nakadawat ang maong kapulisan og impormasyon sa maong lugar diin nahitabo usab ang insidente mao nga nakasumbong dayon ang biktima.
Diha-diha dayon nga miresponde ang kapulisan ug nagpahigayon og follow-up operation.
Kalit nga midagan ang suspek sa sagbutang bahin ug mibunlot sa iyang pusil ug misukol sa mga operatiba pinaagi sa pagpabuto sa iyang .38 revolver.
Patay sa atol sa gihimong operasyon ang maong suspek.
via || Bombo David Francisquete
