DAVAO CITY – Igo na lamang sa pagpatala sa buhatan sa kapolisan sa dakbayan sa Digos ang nanag-iya sa usa ka motorsiklo human karnapa ang iyang motorsiklo, pasado alas tres kaganang kaadlawon.
Naila ang biktima nga usa ka Gina Babatuan Endon, hamtong ang pangidaron, residente sa Tirad Pass St., Del Pillar, Digos City.
Nasayran nga kaganinang lamang buntag mga alas singko ang takna sa kabuntagon, dihang nadiskobrehan nga ang iyang Baja nga motorsiklo nga dunay plate number nga 7699IR giparada sa gawas nga bahin sa ilang pinoy-anan.
Nadiskobre na lamang kaganinang buntag nga wala na kini sa gikahimutangan ug gikatuohan nga gidala kini sa wala maila nga suspek.
Sa gihimo nga dugang pagpanubay sa biktima nasayran nga ang suspek nga posibling midagit sa iyang motorsiklo milampus sa pagdala niini pinaagi sa pagbungkag sa iyang koral nga cyclone wire ug didto gi-agi ang iyang motorsiklo sa likod nga bahin sa ilang balay.
Mihimo na karon ang kapolisan sa dakbayan sa Digos ug dugang pagpanubay ug igo na lamang sa pag-flash alarm ngadto sa tanan nga unit sa kapolisan sa Davao del Sur aron nga ma-intercept ug subling ma-recover ang motorsiklo sa biktima.
