DAVAO CITY – Dili sumala pa babag ang kawad-on ug ekipo o mga pasilidad aron nga mahimo ug tarong nga trabaho sa kapulisan.
Kini ang gibutyag ni Davao City Police Office (DCPO) Director Alexander Tagum human ang gipahigayon nga simulation exercise kagahapong adlawa sa usa ka Mall sa siyudad. Matud pa kang Tagum andam sila nga moresponde sa mga dagkong panghitabo sa dakbayan.
Kahinumduman nga gihatagan ni Police Director General Ronald dela Rosa ang Davao City Police Office (DCPO) ug 9.5 nga grado sa scale nga 1-10 alang sa preparedness level ngadto sa ilang mga personahe nga mipakita sa ilang katakos ug kaandam panahon sa emerhensiya.
Apan luyo niini, gitambag pa gihapon sa opisyal nga kinahanglan pa gihapon nga palambuon sa otoridad ang ilang mga tahas.
Pipila sa mga nagpakita sa ilang katakos sa pag-responde ang gilangkuban sa DCPO, Bureau of Fire (BFP), Task Force Davao (TF Davao), Central 911, Public Safety and Security Command Center (PSSCC) ug uban pang ahensya sa kagamhanan diin ilang gihimo ang mga nagkadaiyang senaryo nga posibleng himuon sa mga dautang elemento.
