Gibatikos ni Cardinal Pablo Virgilio David, presidente sa Catholic Bishops’ Conference of the Philippines (CBCP), ang kawalay pagtagad sa mga adunahan taliwala sa kalisod nga gisagubang sa kadaghanan, ug giila kini nga tinubdan sa korapsyon.
Sa iyang homiliya niadtong Dominggo, gigamit sa kardinal ang sugilanon bahin ni Lazarus gikan sa Bibliya aron ipakita nga dili ang kagutom o sakit maoy hinungdan sa iyang kamatayon, kundili ang kawad-on sa kalooy sa adunahan nga anaa ra sa iyang kiliran.
Gipasabot pa niya nga sama ra kini sa sitwasyon sa daghang Pilipino nga bisan ug naningkamot ug trabaho, dili gihapon igo ang kita alang sa usa ka matinud-anon ug disente nga panginabuhi.
Gipakita usab sa kardinal ang sobra ug maluho nga pamatasan sa pipila ka tawo nga adunay gahum lakip na ang pagkolekta ug kapin sa 40 ka mahalong sakyanan, pagkaon nga nagkantidad ug P700,000 alang sa upat ka tawo, ug regalo nga singsing nga nagkantidad ug P50 milyon. Giingon usab niyang adunay mga politiko nga nag-abuso sa kwarta sa katawhan alang sa kaugalingong interes ug ghost projects sama sa flood control.
Tungod niini, nanawagan pag-usab si Cardinal David sa katawhan nga mobarug batok sa korapsyon. Nahinumdoman nga niadtong Septiyembre 21, misalmot siya sa “Trillion Peso March” batok sa kurapsyon, ug gidasig ang tanan nga moapil sa mga protesta.
