DAVAO CITY – Paspasan sa Bureau of Jail Management and Penology (BJMP) ang pagtukod sa P380-million Davao City mega jail aron nga makunhuran ang paghuot sa mga peneriso sa Davao City Jail sa Maa district.
Matud pa kang BJMP spokesman Jail Inspector Edo Lobenia ang nahisgutan nga gambalay nga ipahimutang sa walo ka ektarya nga propedad sa Wangan, Calinan ang gi-bid out na sa Department of Public works and Highways (DPWH) 11.
Sugdan sumala pa sulod karong bulana ang pagtukod sa jail facility nga mamahimong maka-akomodar ug 6,000 ka mga peneriso.
Nasayran nga ang paghuot sa city jail sa Maa ang anaa na sa 696 percent uban ang populasyon nga 3,348 gikan sa ideal number nga 421.
Matud pa kang Lobenia nga ang paghuot sa mga presohan mamahimong hinungdan nga mabutang sa risgo ang panglawas binilanggo ug posibleng suliran usab sa seguridad.
Gikanayong ang dakbayan sa Davao adunay pinakahuot nga presohan sa rehiyon, gisundan sa lungsod sa Montevista nga anaa sa 683 percent; Island Garden City of Samal nga anaa sa 407 percent, ug Tagum City anaa sa 192 percent.
Gitataw ni Lobenia nga 80 porsyento sa mga peneriso sa siyudad ang nabilanggo gumikan sa pagkalambigit sa ginadili nga droga.
