Nakalusot na sa House of Representatives sa ikatulo ug katapusang pagbasa ang usa ka balaodnon nga nagtumong sa pagtukod og multi-specialty hospital sa Davao de Oro.
Ang House Bill No. 8239, nga giduso niadtong Hulyo 30, 2025, nagtugot sa pagtukod sa Davao de Oro Multi-Specialty Hospital sa munisipalidad sa Monkayo, nga adunay tumong nga mapaayo ang access sa specialized ug kalidad nga healthcare services sa probinsya.
Ang maong balaudnon giduso nila Conggresswoman Maricar Zamora-Mabanglo ug Cong. ‘Jhong’ Ceniza.
Sumala ni Cong. Maricar, ang pag-apruba sa Kamara usa ka dako nga lakang padulong sa tinuod nga katukuran sa dugay nang gihandom nga ospital sa probinsya, ug giila ang potensyal niini sa pagpaayo sa delivery sa medical services, ilabi na sa pagtubag sa komplikadong kahimtang sa panglawas nga dili maserbisyuhan sa ordinaryong mga ospital.
Gibutyag usab niini nga ang balaod nagpakita sa ilahang padayon nga paningkamot sa pagpalambo sa mga programa ug inisyatibo nga nagtubag sa panginahanglan ug kaayohan sa mga lumulupyo.
Pagkahuman sa pagpasa sa House, ang maong sugyot ipadala na sa Senate of the Philippines alang sa deliberasyon ug katapusang pag-apruba.
Kung mahimo na kining hingpit nga balaod, ang ospital ibutang ubos sa pagdumala sa Department of Health ug pondohan kini pinaagi sa General Appropriations Act.
