DAVAO CITY – Gipasalig sa mga tigdumala sa Malagos Double A slaughterhouse nga luwas ug limpyo ang ilang mga karne nga ilang ginaandam alang sa merkado.
Gikanayon ni Joseph Gabut, slaughterhouse master, nga bag-uhay lamang nila nakuha ang certification sa maong slaughterhouse gikan sa National Meat Inspection Service, nga nagpalig-on sa pag-abot sa pinakataas nga sumbanan sa usa ka katayan.
Dagko sab ang higayon niini alang sa mga magbababoy nga makaginansya ug makapalapad pa sa ilang negosyo tungod pwede nila ibaligya ang karne sulod o gawas sa Davao Region, lakip tibuok Pilipinas.
Dili pa man kini abli alang sa pampublikong merkado gumikan alang una kini sa mga pribadong meat companies ang maong pasilidad.
Kahinumdumang giablihan ang Malagos slaughterhouse kaniadtong Setyembre sa nakalabayng tuig nga nagkantidad og kapin P94 million pesos nga budget gikan sa DA National Livestock Program, DA Bottom-up-Budgeting Program ug Davao City Government.
via || Bombo LJF
