DAVAO CITY – Nagtinabangay kaganinang buntag ang mga katawhan sa Matina Crossing, sakop sa City Environment and Natural Resources Office (CENRO) ug mga Environmentalist Group for Sustainable Davao Movement sa paghinlo sa View deck sa Shrine Hills nga nabulit sa gilabay nga mga basura.
Gikanayon ni Lan Manalo sa grupong Interface Development Interventions (IDIS) nga sa milabay nga tuig pa nila kini nga gipadangat sa pagtagad sa CENRO ug sa Barangay apan niining adlawa pa lamang nahatagan ug pagtagad.
Pipila sab ka tonelada sa basura ang ilang nahipus gikan sa dapit, diin ang uban nga mga basura nahimutang na sa bakilig nga bahin nga dili na sayon ang pagkuha niini.
Gikasubo sa IDIS gumikan kay gihimo na nga dumping site sa uban nga mga tawo nga labayanan ug basura ang Shrine Hills ug bout niini nga dunay himoon ang barangay ug ang CENRO aron nga maundang na kini.
Gikabalak-an nga kung pasagdan lamang kini mas molapad pa kini, labi na sa ubos nga bahin sa Royal Pines.
Gibanabana nga mi-abot na sa dosentos metros kwadrado ang naabtan sa basura nga gilakipan sa mga plastic, organic materials, ug mga buhok gikan sa mga saloon.
