Nagmalipayong nagselebrar ang mga tawo sa Israel ug Gaza human magkasinabot sa usa ka ceasefire agreement.
Sa Hostages Square sa Tel Aviv, Israel, nagtigom ang mga katawhan aron ipadayag ang ilang kalipay sa maong kasabutan.
Daghang Israeli ang mipakita sa ilang kalipay nga sa katapusan, mapagawas na ang mga bihag nga gidakop sa Hamas, ug makapauli na kini sa ilang mga panimalay human sa duha ka tuig nga pagkabihag.
Sa Gaza, nagselebrar usab ang mga Palestino sa kasabutan, naglaum nga kini na ang sinugdanan sa katapusan sa mapintas nga mga atake sa Israel sa ilang teritoryo.
Nagtapok ang mga tawo duol sa Nasser Hospital sa Khan Younis, nagpalakpak ug nagpagawas sa ilang kalipay.
Apan bisan pa sa kasabutan, nagpadayon gihapon ang kabalaka sa duha ka bahinn sa Israel ug Gaza nga basin mabungkag ra gihapon ang maong ceasefire.
Gimanduan sa Israeli military ang ilang mga sundalo nga mag-andam sa bisan unsang posibleng kalihokan, samtang gipahimangnoan ang mga Palestino sa Gaza nga dili usa mobalik sa amihanang parte sa Gaza o pagduol sa mga lugar nga adunay presensya sa Israeli Defense Forces.
Kahinumduman nga gi-anunsyo ni US President Donald Trump nga napirmahan na sa Hamas ug Israel ang unang hugna sa ceasefire agreement niadtong gabii sa Miyerkules.
