Mipadayag og suporta ug paglaom ang mga nag-una nga opisyal sa Bangsamoro human gipirmahan ni Pangulong Ferdinand R. Marcos Jr. ang Republic Act No. 12317, nga nag-reset sa makasaysayanong parliamentary elections ngadto na sa Setyembre 2026.
Giamyendahan sa bag-ong balaod ang pipila ka probisyon sa Bangsamoro Organic Law ug nagtakda sa labing una nga regular Bangsamoro Autonomous Region in Muslim Mindanao (BARMM) elections sa ikaduhang Lunes sa Setyembre 2026, diin ang mosunod nga mga eleksyon ang i-hiusa na sa national ug lokal nga eleksyon sa Mayo 2031.
Gihulagway ni Maguindanao congressman Esmael “Toto” Mangudadatu ang bag-ong kalamboan nga naa sa tukmang panahon dungan sa pagkanayon labot sa kamahinungdanon sa pagpangandam sa mga kandidato ug sa mga botante alang sa nahisgutang piniliay.
Naglaom usab si Mangudadato nga ang maong eleksiyon ang magmalinawon ug ang tanan nga mga opiosyaol ang magmatinud-anon sa pagserbisypn sa katawhan.
Samtang, gipasalig usab ni Acting Senior Minister Abdullah M. Cusain nga andam na ang tanan aron masiguro ang matinud-anon ug hapsay nga piniliay luyo sa mga na-una nga paglangay niini.
Gibutyag usab ni Mohajirin Ali, MNSA spokesperson sa United Bangsamoro Justice Party ug MILF information officer, nahisubay ang maong lakang sa dugay nang panawagan alang sa pagpahigayon sa BARMM elections.
