Nasikop ang usa ka katabang human giakusahan sa iyang amo sa pagpangawat og kwartang gitago sa cabinet sulod sa balay niadtong Hulyo 20, 2025.
Ang biktima giilang si “Jenjen”, 52 anyos, residente sa Obrero, Barangay 15-B, Davao City.
Sumala pa niya, nadiskobrehan niya nga P275,000 na lang ang nabilin sa iyang gitipigan nga P500,000, nga nagbilin og kulang nga P225,000.
Gisuspetsahan ni Jenjen ang iyang katabang nga si alyas “Ana”, 33 anyos, minyo, ug residente sa Barangay Mamacao, Sta. Maria, Davao Occidental, isip posibleng nangawat sa kuwarta.
Subay sa sa report, alas 8:10 sa buntag niya unang nadiskubre ang pagkawala, ug alas 11:15 sa samang adlaw, gikumpirma na niya ang kakuwang sa iyang kwarta.
Dungan niini, iyang gitawagan ang katabang ug gipangayuan og pasabot, labi na nga bag-o pa lang namatay ang inahan sa biktima, hinungdan nga mas grabe ang kasakit ug kabalaka nga iyang gibati.
Paglabay sa pipila ka oras, mibalik ang suspek sa balay ug P20,000 ra ang iyang nadala nga kuwartang gibalik.
Apan kini wala makapahupay sa biktima, hinungdan nga gitaho kini dayon sa kapulisan sa Sta. Ana Police Station.
Sa pagkakaron, nakakustodiya na ang suspetsado ug mag-atubang og kasong qualified theft, usa ka seryosong kaso ilawom sa Revised Penal Code.
Nagpadayon pa ang imbestigasyon sa insidente samtang gipaabot sa biktima ang hustisya alang sa nawala niyang kantidad sa kwarta.
