Gitutukan karon sa Davao City Police Office (DCPO) ang posibleng panagbingkil sa yuta nga motibo sa brutal nga pagpatay sa 23-anyos nga utility worker sa Barangay Baganihan, Marilog District, Davao City niadtong Abril 29, 2025.
Sa gipadayon nga imbestigasyon, giila ang biktima nga si Gilbert Anggob Dumayhag, usa ka Barangay Utility worker ug residente sa Purok 9, Sitio Bagong Silang.
Matod ni Police Captain Hazel Caballero-Tuazon, ang tigpamaba sa DCPO, aduna na silay person of interest sa kaso, ug gipalawom pa ang imbestigasyon aron makumpirma ang hinungdan sa krimen.
Base sa pahayag sa saksi, kalit nga migawas ang suspek samtang nangihi ang biktima sa atubangan sa ilang balay ug gipusil kini dayon.
Misulod pa ang biktima sa balay aron mangita og tabang apan gisundan siya sa suspek ug gipusil pag-usab hangtod namatay.
Nakuha sa crime scene ang duha ka basyo sa kalibre .45 nga armas ug kapin 50 ka bala sa 5.56mm nga pusil.
Gisumite na kini sa SOCO alang sa ballistic examination aron makatabang sa pag-ila sa hinanaling responsable.
Nagpadayon usab ang imbestigasyon sa kapulisan aron masayran ang tinuod nga motibo ug mailhan ang suspek sa krimen.
