DAVAO CITY – Hingpit na nga naduso ang kasong murder batok sa suspek kinsa mipatay sa mag-amahan nga Marinque sa Diamond Village Matina Aplaya ning dakbayan sa milabay nga semana.
Sumala pa kang Police Major Noel Villahermosa, hepe sa Talomo PNP, naduso ang duruha ka ihap sa kasong murder batok sa suspek nga si Rio Ballenas, 30 anyos, pinaagi sa summary inquest procedure.
Una ng nasayran nga anaa sa walo ka mga samad dinunggaban ang naangkon ni Panfilo Marique, 71 anyos samtang unom usab ang naangkon sa anak niini nga si Geraldine, 43 anyos.
Gikanayon sab ni Villahermosa nga plano unta sa suspek nga musibat apan dali kini nga nasikop sa tabang usab sa mga silingan sa mga biktima.
Gikanayong dili lamang kini ang unang higayon nga nakahimo ug krimen ang suspetsado sanglit kaniadtong tuig 2020 nakadunggab patay sab si Ballenas sa Buhangin ning siyudad human nga gi-atngan niini ang tulo ka mga lalaki.
Nakagawas lamang kini kaniadto sa presohan human nakaduso ug piyansa.
Gikatakda sab nga ibiyahe paingon sa Misamis oriental ang patay’ng lawas sa mga biktima diin lumad nga nanimuyo ang mga nahisgutan.
