DAVAO CITY – Gikatala karon sa City Health Office (CHO) ang 16 ka mga kompirmadong kaso sa tipdas o measles samtang lain pang 222 ka mga suspected cases sa 36 ka mga barangay sa dakbayan sa Dabaw.
Gikumpirma usab sa CHO nga bugtong ang Paquibato ug Baguio districts lamang ang walay gikareport nga bisan usaka kaso sa measles.
Hinuon, dili tanang mga pasyente naggikan sa dakbayan sa dabaw gumikan kay adunay pipila naggikan pa sa kasikbit nga probensiya ug syudad nga igo lamang nagpa-admit sa ospital sa Southern Philippines Medical Center (SPMC), samtang ang uban naggikan usab sa mga lugar diin apketado sa gubat.
Gikanayon ni Assistant City Health Officer Dr. Marjorie Culas nga ang pinaka-unang kaso sa measles ang ilang gikatala niadtong Nobyembre sa nakalabay nga tuig 2017 ug nagsugod na sa pagsaka pag-abot sa bulan sa desyembre.
Atol sa gilusad nga Outbreak Immunization Response (ORI) niadtong nakalabay nga bulan sa Nobyembre ug Desyembre nakahimo ang CHO sa pag-bakuna sa 15 ka mga kabataan, apan adunay 600 ang wala nabakunahan gumikan human mibalibad ang mga ginikanan.
Tungod nini, gipaniguro ni Culas nga epektibo ug walay side effects ang measles vaccine (MMR) nga ginagamit na sa gobyerno sulod sa pipila ka dekada.
