DAVAO CITY – Nakatala karon ang Department of Health-Davao Region (DOH-Davao) ug dakong ihap sa pag-ubos sa measles cases sa rehiyon karong 2020 kung itandi sa 2019.
Base sa comparative data nga gi-presenta sa DOH-Davao, atol sa unang semana karong bulan sa Oktubre, nakatala na sila ug kinatibuk-ang 580 cases samtang pito ang namatay.
Dako sumala pa ang gi-ubos niini kung itandi sa 1,504 nga natala sa milabay nga tuig diin anaa sa 17 ang namatay. Base sa 2020 data, ang Davao Oriental ang adunay pinakataas nga kaso sa tipdas nga anaa sa 263 ug tulo ang natalang namatay,
Gisundan kini sa Davao City nga adunay 109 cases ug duruha ang namatay; Davao del Norte nga adunay 92 cases ug two deaths.
Ang Davao de Oro, Davao del Sur ug Davao Occidental nakatala ug 57, 44 ug 15 cases ug walay natalang namatay.
Sumala pa kang DOH-Davao Director Annabelle Yumang nga sagad sa kaso rehiyon karong tuiga ang natala atol sa unang quarter o pre-Covid-19 pandemic.
Gi-awhag sab sa opisyal ang mga ginikanan nga pahimuslan ang ilang ipahigayon nga Measles Rubella Supplemental Immunization Activity nga magsugod karong October 26 hangtud November 25 kini aron nga madungagan pa ang proteksiyon sa panglawas sa mga bata.
