DAVAO CITY – Gipahibalo sa bag-ong DCPO Director nga si Alberto Lupaz, nga aduna sumala pay pag-ubos ngadto sa 11-percent ang mga natalang rape incidents sa dakbayan apan dili kumbinsido ang opisyal nga kaso sa sexual assault ang miubos usab.
Gikanayong subay sa comparative statistics, kinatibuk-ang 170 rape cases ang natala kaniadtong 2020, samtang 152 cases ang gika-report pagsulod sa 2021.
Gikanayong ang Talomo Police Station ug Tugbok Police Station ang nakatala ug mas taas nga ihap sa rape cases sa susama nga mga tuig.
Ang Talomo adunay 17 ug 22 ka kaso sa 2020 ug 2021, samtang kinatibuk-ang 17 ug 21 ka kaso sa susama nga period ang natala sa Tugbok.
Wala na sab mihatag ang police official ug specific breakdown sa matag age group, apan sagad sumala pa sa mga nalambigit nga biktima ang anaa sa edad 12 hangtud 17 anyos, gisundan sa 18 hangtud 25 nga age group.
Sagad sab sumala pa sa mga kaso ang gilangkuban sa incestuous rape, diin ang mga suspek ang gilangkuban sa amahan, igsuon o mga paryente.
Sa kasamtangan, wala pa silay datus alang sa 2022 sanglit padayon pa nila kini nga gikolekta.
Apan luyo sa dyutay nga pag-ubos sa mga gikatala nga kaso sa rape sa datus, posibleng aduna pa gihapoy mga susama nga insidente nga wala natala sanglit adunay uban nga mga biktima ang magduha-duha sa pagsumbong ngadto sa otoridad gumikan sa ilang sitwasyon.
Nasayran nga ang rape, ang usa sa pinaka-sensitibo ug lisud nga masolusyonan sanglit sagad kini nga mahitabo sulod mismo sa panimalay.
