DAVAO CITY – Nigawas ang lain pang alegasyon sa nadakpan nga myembro sa Philippine Coast Guard nga si Khalid Abdullah atol sa pagkasikop kaniya sa NBI 11.
Gikanayon ni NBI 11 regional director Arceli Albao nga gituohang nalambigit matud pa sa Abdullah sa mga serye sa pagpanglugos sa Digos City ug Bansalan sa Davao del Sur, apan ila pang ginaimbestigahan kini.
Kahinumdumang una nang gireklamo sa biktimang si alyas “Jean”, 21 anyos, modelo ug residente sa Davao City, nga gilugos siya ni Abdullah sa usa ka sa ngitngit nga bahin sa Cabantian, Buhangin human sila nakigkita sa unang higayon ug gihatod sa suspek gikan sa usa ka event sa Matina niadtong Abril 18.
Human nga gireklamo sa biktimang modelo ang maong sakop sa PCG, naglusad ang NBI SEMRO og entrapment operation niadtong Abril 22, adlawng Sabado sa gabii, hinungdan sa pagkasikop sa suspek.
Desidido karon ang biktimang si alyas “Jean” nga pasakahan og kaso ang tawong nagtamay kaniya.
Gikaatubang karon ni Abdullah ang patong-patong nga kasong Republic Act 8353 kon Anti-Rape Law, RA 9208 kon Anti-trafficking of Persons, ug RA 10591 kon Illegal Possession of Firearms.
Kasamtangang gikustodiya na ang dinakpan sa NBI 11.
via || Bombo LJF
