Kumpiyansa si Department of the Interior and Local Government (DILG) Secretary Jonvic Remulla nga hapit na masulbad ug matagaan og hustisya ang kaso sa mga nawagtang nga sabungero, human makit-i ang mga bukog nga posibleng iya sa tawo.
Sa usa ka paghinabi atol sa iyang pagbisita sa Camp Crame, nagtuo ang kalihim nga ang pagkadiskobre sa unom ka sako nga adunay bukog sa gituohang gikan sa tawo, usa kini ka mahinungdanon nga lakang padulong sa pagresolba sa kaso.
Matod ni Remulla, kung mapamatud-an nga tinuod nga bukog sa tawo ang nakit-an, kini mopatigbabaw sa kamatuoran sa mga gipanumpaan nga pahayag ni Julie “Dondon” Patidongan o alyas “Totoy,” nga nagpunting sa likod sa misteryosong pagkahanaw sa mga sabungero.
Gidugang pa niini nga anaa na silay gipanghawiran nga laing ebidensya nga mosuporta sa kaso, kauban ang mga video sa aktwal nga pagpangdagit, mga litrato, ug mga pwersadong pag-angkon nga magpalig-on sa giingon ni Remulla nga usa ka “Grand Conspiracy” ang nahitabo.
Samtang, kung mapamatud-an nga ang giingong hip bone nga nakuha sa Taal Lake mohaom sa DNA sa usa sa mga kabanay sa nawagtang nga sabungero, kini maghatag og konkreto nga basihan sa mga pahayag nga naglatid sa tinood nga nahitabo.
Gisiguro usab ni Remulla nga siya mismo, kauban si Philippine National Police (PNP) Chief PGen. Nicolas Torre III, ang personal nga moaresto sa mga tawo nga mapamatud-ang nalambigit sa pagpangidnap ug pagpamatay sa mga sabungero.
Gibutyag usab ni Remulla nga ang imbestigasyon magpadayon sa prinsipyo nga “no sacred cows,” nga nagpasabot nga walay luwas bisan pa mayor, gobernador, o senador kung mapamatud-an nga lakip sa maong krimen.
Sa pagkakaron, anaa na sa Department of Justice (DOJ) ilawom sa pagpangulo ni Justice Secretary Jesus Crispin Remulla ang listahan sa mga personalidad nga giingong miyembro sa Alpha Group, nga gilakip sa mga pahayag ni Patidongan.
Ang maong mga pangalan moagi pa sa proseso sa beripikasyon aron masiguro nga ang mga tinood nga responsable lamang ang makasohan ug madala sa hustisya.
