DAVAO CITY – Nagkaubos na ang ihap sa mga na-admit sa COVID-19 hospital beds sa Southern Philippines Medical Center kon SPMC.
Sa labing ulahing datos gikan sa nasangpit nga balay-tambalanan, 420 gikan sa 517 nga Ward beds ang kasamtangang okupado. Anaa usab sa 90 ka ICU beds gikan sa 111 ang okupado usab.
Layo na kini sa kahimtang sa mga milabayng adlaw, kanus-a nahimong puno-puno ang SPMC gumikan sa kadaghan sa mga buot magpa-admit nga COVID-19 patients.
Gani, niabot pa sa higayon nga bugtong moderate, severe, ug critical COVID-19 cases ug mga non-COVID patients nga nanginahanglan og hinanaling pag-atiman ang ilang gi-admit.
Kadtong mild ug asymptomatic COVID patients ang gihangyo usa nga manawag sa One Hospital Command Center alang sa pagpa-admit.
Naghinaot ang SPMC nga magpadayon pa ang pagkunhod sa ihap sa mga pasyenteng natapdan sa nahisgutang sakit.
Sa pikas bahin, wala pa naayo ang automated extraction machine sa SPMC Molecular Laboratory, nga paspas unta nga makaproseso sa swab samples.
Nakaapekto usab kini sa mga matalang ihap sa aktibong kaso dili lang sa Dakbayan kung dili apil na sa tibuok rehiyon.
Samtang nagapaabot nga maayo o di kaha mapulihan ang makina, mano-mano usa ang pagproseso nila sa swab samples sa ilang laboratoryo.
