DAVAO CITY – Wala pa maka-abot sa Regional Office sa Department of Education Region XI ang reklamo batok sa usa ka maestra sa New Bataan, Compostela Valley Province nga nangusi sa aping sa iyang tinun-an.
Kini ang gibutyag ni DepEd XI spokesperson Jenelito “Dodong” Atillo sa pakighinabi sa Boombo Radyo.
Hinuon, sumala pa ni Atillo nga sa higayong maka-abot sa ilang buhatan ang maong reklamo ila kining hatagan gilayon ug nag-una nga pagtagad sanglit dili sila buot nga malambigit ang si kinsa man nga public school teacher sa pagpangabuso ngadto sa ilang mga tinun-an.
Gipasalig ni Atillo nga kung unsa man ang mamahiming resulta sa ilang himuon unya nga lakang, mamahimo kining patas ug manggi-angayon.
Sama sa ubang mga reklamo, mo-agi gayud sa tukmang proseso (due process) ang tanan ayha sila mopakanaug ug desisyon.
Dugang pa ni Atillo nga una maka-abot sa DepEd Regional Office angayang husayon una kini sa school principal. Gidasig usab ni Atillo ang ginikanan nga personal mopadangat sa ilang reklamo.
Hinuon sa kaso nga gikalambigitan ni Erlinda Bagaan, magtutudlo sa Cabinuangan Elementary School sa New Bataan, Comval diin nakabalo na ang DepEd, pwede na sila molusad gilayon ug imbmestigasyon.
Gitin-aw usab ni Atillo nga bisan ug naay complainant batok kang Bagaan wala nila kini gikondena.
