Gilaumang musaka ang kaso sa leptospirosis sa mosunod nga mga adlaw gumikan sa kusog nga pag-ulan hatod ni bagyong Carina ug Habagat nga miresulta sa grabeng pagbaha sa pipila ka bahin sa Luzon, matod pa sa Department of Health (DOH).
Gipahayag ni Health Secretary Ted Herbosa, ang incubation period sa leptospirosis ang mukabat sa lima hangtod sa 14 ka adlaw, hinungdan nga posibleng manggawas ang mga kaso sa mosunod nga semana.
Dugang gipahayag sa opisyal nga ang importante kung ikumpara sa pagbutang ug leptospirosis lane sa DOH mao ang pagpakatag sa inpormasyon kung paunsa masayran ug matambalan ang sakit.
Niadtong bulan sa Hulyo 13, adunay kinatibuk-ang 1,258 ka mga kaso sa leptospirosis ang gikatala sa nasud karong tuiga ug 133 niini ang nakabsan sa kinabuhi.
Ang mga mosunod nga rehiyon nga nakabaton ug pagsaka sa kaso sa leptospirosis gikan sa Hunyo 2 hangtod sa Hulyo 13 mao ang: Zamboanga Peninsula, Caraga, Soccsksargen, Western Visayas, Mimaropa, Eastern Visayas, ug Northern Mindanao.
