DAVAO CITY – Nadungagan pa ang ihap sa mga indibidwal nga apektado sa nahitabong diarrhea outbreak sa Toril District ning syudad diin nasayran nga miabot na sa 212 ka mga indibidwal ang nagka-diarrhea.
Gawas niini, miabot na sab sa 21 ka mga barangay ang apektado nga gilangkuban sa 18 ka mga barangay sa Toril Ditrict samtang aduna say laing tulo ka mga barangay ang apektado nga gawas na sa Toril areas.
Sumala kang CHO Head Dr. Ashley Lopez, subay sa ulahing datos gikan sa Incident Command Center, anaa sa 87 ang total active cases karon nga gi-admit sa walo ka mga ospital sa syudad.
Pito ang naulian lakip na ang tulo ka bulan nga batang masuso. Gawas niini, mukabat na usab sa duha (2) ang namatay tungod sa sa diarrhea.
Nasayran nga gawas sa 10 anyos nga batang lalaki nga nakabsan sa kinabuhi niadtong Hulyo 19, kabsan usab sa kinabuhi kagahapong adlawa ang 67 anyos nga residente sa Bato kinsa na admit sa Viacrusis Hospital tungod sa pagsuka-suka ug kalibanga.
Gikumpirma ni Dr. Ashley Lopez, hepe sa Davao CHO, nga atol sa pagka-admit sa maong pasyente, nagka-hemorrhagic stroke kini hinungdan sa iyang kamatayon.
Samtang, pinakadaghang kaso ang natala sa Daliao nga anaa sa 41; Toril Proper nga anaa sa 37; Lubogan nga anaa sa 35; Crossing Bayabas anaa sa 32; Lizada 19; Bato 14; Mulig 5; Bangkas Height 4; Binugao 4; Camansi 3; Catigan 3; Eden 3; Marapangi 3; Sirawan 3; Tungkalan 2; Alambre 1 ug Baracatan nga adunay usa. Sa pikas bahin, miabot kagahapong adlawa sa syudad ang tulo ka mga eksperto gikan sa Epidemiology Bureau sa Department of Health Central Office aron magsilbing third party nga mutabang sa imbestigasyon sa diarrhea outbreak sa Toril District.
BY BOMBO ALLIANNE SILAO
