Subling nagpahinumdom ang Davao City Police office sa mga katawhang Dabawenyo ilabi na sa mga ginikanan nga gidili dinhi sa dakbayan ang unsa man nga matang sa mga improvised nga mga pabuto karong panahuna.
Kini ang gipahayag sa kapulisan human nga nakumpiska sa sakop sa Talomo Police Station ang pipila ka mga improvised nga lantaka nga ginama sa lata ug plastik gikan sa usa ka 16-anyos nga batang lalaki sa Barangay Talomo, Davao City.
Subay sa police report, alas 7:10 sa gabii, mipahigayon og ocular inspection ang mga personahe sa Talomo Police Station sa Gertrudes Road, Ulas, human makadawat og sumbong may kalabotan sa paggamit sa lantaka sa maong lugar.
Pag-abot sa mga pulis sa lugar, gitudlo sa mga residente ang usa ka menor de edad nga giingong nipabuto og lantaka niadtong Lunes, Disyembre 8, 2025, atubangan sa ilang panimalay duol sa Coca-Cola plant sa Ulas.
Midiretso ang mga pulis sa balay sa menor de edad, diin boluntaryong gihatag sa iyang inahan nga si Marilyn, 45-anyos, ang tulo ka improvised lantaka.
Dayon kining gisiguro ug gidokumento sa Talomo Police Station aron malikayan ang posibleng peligro sa katawhan.
Nasayran nga dinhi sa dakbayan adunay City Ordinance No. 060-02, Series of 2002, nga nagdili sa paghimo ug paggamit sa lantaka ug uban pang improvised noise-making devices.
Una na nga gibutyag sa kapulisan nga dili kini magpakita og kaluoy sa mga masinupakon sa maong balaod.
