Laraw karon sa Tagum PNP nga dugangan ang iduso nga kaso batok sa gika-ingon nga usa ka propesyunal hitman nga nadakpan sa mga otoridad sa Mankilam, dakbayan sa Tagum.
Partikular nga dugang ipasaka nga kasog Murder nga nahitabo sa dakbayan sa nakalabay nga tuig.
Giila ang dinakpan nga si Sherwin Barrot nga ning kasamtangan anaa na sa kostudiya sa Tandag Police Station ug gipaabot ang kamanduan sa korte.
Kahinumduman nga nadakpan sa Tagum Police Station ang gikonsidera nga propesyonal hitman nga sumala pa sa mga otoridad, nalambigit ang suspek sa mga sagunson nga pagpamusil sa syudad ug sa ubang bahin sa caraga Region.
Nasayran usab nga anaa sa ika-6 sa listahan sa kapolisan nga Most Wanted Person sa rehiyon sa CARAGA ug adunay usa ka outstanding warrant of arrest alang sa mga kasong pagpatay.
Nakuha gikan sa suspetsado ang usa ka .45 caliber Colt, duha ka magasin ug 15 ka mga buhing bala.
Sumala pa sa otoridad, nga ang mga narekober nga armas gisubmitar sa Davao del Norte Provincial Forensic Unit alang sa eksaminasyon pinaagi sa Integrated Ballistic Identification System kon IBES nga miresulta sumala pa nga ang armas nalambigit usab sa 10 ka mga panghitabo sa pagpamusil sa rehiyon 11 ug 13 gikan 2020 hangtud 2024.
Gikataho usab sa kapolisan, nga ang mga insidente nga nalambigit ang armas naglakip sa mga panghitabo sa Mankilam, Tagum City, niadtong Nobyembre 26, 2020, Butuan City niadtong Disyembre 27, 2020, Agusan del Sur niadtong Enero 24, 2021, ug Maragusan, Davao de Oro niadtong Enero 27, 2021.
Nalambigit usab ang pusil sumala pa sa Bislig City niadtong Marso 8, 2021, Arellano, Tagum City niadtong Marso 9, 2022, ug Surigao City niadtong Marso 31, 2022.
Dugang pa sa kapolisan nga ang armas usab konektado sa mga pagpamusil sa Pimentel Sports Complex sa Tandag City niadtong Agosto 20, 2022, ug sa Mankilam, Tagum City niadtong Disyembre 6, 2022.
Ang labing bagohay lamang nga pagpamusil niini nahitabo atong miaging tuig, Enero 11, sa Freedom Park, Tagum City diin ang biktima mao ang usa ka OFW nga babaye.
