DAVAO CITY – Gumikan kay nagkaduol na ang pahinumdom sa semana santa,gi-andam na sa otoridad ang ilang comprehensive security plan aron masiguro ang seguridad sa 31 ka mga katolikong simbahan latas sa siyudad.
Matud pa kang Davao City Police Office (DCPO) spokesperson Police Senior Inspector Ma. Teresita Gaspan, ideploy sumala pa ang mga police officers sa mga simbahan aron lamang masiguro ang kahusay ug kalinaw.
Magpatuman matud pa ang kapulisan ug mandatory security checks sa airports, seaports, ug bus terminals. Magpakatag sab ug mga Police officers sa mga kadalanan aron maoy modumala sa dagan sa trapiko ug daghanan pa.
Gipahimangnoan sab sa opisyal ang publiko nga dili pasagdan ang ilang mga panimalay aron masiguro nga dili makapahimulos ang mga kawatan.
Magpahigayon sab ug monitoring ang kapulisan sa mga subdivisions ingon man mga resorts ilabi na nga sagad dagsaon ang mga beach panahon sa semana santa. Plano sab sa kapulisan nga magpahimutang ug community assistance desk aron motabang sa publiko panahon sa emerhensiya ug kung adunay security concerns.
Gipasalig sab sa kapulisan ang Internal security preparation ug close coordination tali sa uban nga mga law enforcement agencies aron malikayan nga makasulod ug makahimo ug dautan ang mga teroristang grupo panahon sa Holy Week.
