DAVAO CITY – Gipasalig sa Talomo Police station pinaagi sa ilang hepe nga si Police Major Sean Logronio nga himuon nila ang tanan aron lamang mahatagan ug kasulbaran sa hinanaling panahon ang kamatayon sa magti-ayon nga sila si Atty. Hilda Mahinay-Sapie ug bana niini nga si kanhi Panamao Sulu Mayor Muhaimen Mohammad Sapie.
Kahinumduman nga sa gipagula nga CCTV footage, makita nga kalit na lamang nga nahagba si Atty. Sapie hinungdan nga nataranta ang mga tawo nga anaa sa iyang palibut sanglit wala nila igkita kung si kinsa ang mipusil.
Dihang gitabang kini sa iyang bana, kini na sab ang kalit nga natumba. Nagtoo ang otoridad nga migamit ug sniper ang suspek sanglit layo sumala pa ang boto nga ilang nadungog.
Ilado si Atty. Sapie sa legal involvement sa mga isyu sa yuta sa rehiyon human kini miretiro sa Department of Agrarian Reform pipila ka tuig na ang milabay.
Samtang ang bana niini nga si Muhaimen ang bag-ohay lamang nga nadakpan sa Traffic Enforcement Unit human nga nakasupak sa balaud trapiko. Ginadayo sab sumala pa ang ilang balay sa Solariega Subdivision Talomo ning dakbayan sa mga tawo nga buot mangayo ug legal advice ilabi na kung aduna kini kalabotan sa yuta.
Nakapahigayon na sab kagahapon ug ocular inspection ang mga personahe sa Criminal Investigation and Detection Group (CIDG) sa lugar diin nahitabo ang krimen ug gisubay ang pipila ka mga pinuy-anan sa lugar sa pamasin nga aduna pay mahipus nga mga ebidensiya.
Samtang gikanayon ni Logronio nga ang mga nahipus nila sa crime scene ang anaa sa PNP crime laboratory ug hulaton pa nila ang mamahimong resulta niini.
Anaa sab sumala pa karon sa morgue sa SPMC ang patay’ng lawas ni Atty. Sapie aron nga ipailalom sa otopsiya samtang gilubong na sab dayon kagahapon ang bana niini nga si Muhaimen Mohammad kini subay sa tinuohang muslim.
