DAVAO CITY – All set na ang tanang sakop sa Davao City Police Office (DCPO), kasundalohan ug ang uban pang security counterpart sa gikatakdang oath-taking ceremony ni Vice President-elect Inday Sara Duterte sa umaabot nga adlaw’ng Domingo, Hunyo 19, 2022.
Kini mismo ang gibutyag sa tigpamaba sa DCPO nga si PMaj. Ma. Teresita Gaspan diin giangkon sab niini nga mas-intensified ug nagpadayon ang ilang fine tuning sa ipatumang security operations.
Nasayran nga anaa sa 4,076 security personnel ang i-deploy sa maong adlaw.
Nagpahimangno na lamang karon ang buhatan sa DCPO nga tumanon ang mga DO’s and DONT’s sa maong aktibidad.
Gitino ni Gaspan nga ipatuman ang tanang existing nga City Ordinances sa dakbayan sa Davao sama na lamang sa mandatoryo nga pagsul-ob og facemask.
Dili usab allowed ang pagdala og backpack ingon man ang pagsul-ob og jacket.
Gawas niini, dili usab tugutan ang mga drones gawas na lamang sa mga nakakuha og security clearance.
Bawal usab ang alcoholic drinks, bladed weapons ug iligal nga droga.
Gihangyo sab ang mga dabawenyo nga mahimong responsable sa ilang tagsa-tagsa ka mga basura.
Giklaro usab ni Gaspan nga walay nadawat ang syudad nga serious threat apan gipamugos niini nga dili sila magpakumpyansa.
Hugot ang panaad sa kapulisan nga masiguro nga luwas ang tanang tawo nga muadto sa inagurasyon ingon man ang mismong venue.
Sa pikas bahin, nagpadayon sab ang monitoring, peace build-up aron nga mapugngan ang bisan unsa mang dili maayong panghitabo mismo sa pagpanumpa ni incoming Vice President Inday Sara.
