DAVAO CITY – Gipanubayan na karon sa otoridad ang tanan nga anggulo ug posibleng motibo sa pagpusil patay sa broadcaster nga Orlando “Dondon” Dinoy , residente sa Mother Ignacia Street, Poblacion Uno sa lungsod sa Bansalan kagabii.
Posibleng adunay lalom nga kalagot ang mipaluyo sa krimen sanglit anaa sa unom ngadto na sa pito ka mga boto ang nadungog sulod sa apartment niini.
Kahinumduman nga nagluto lamang ang biktima ug panihapon ang biktima dihang kalit nga mibutho ang mga suspetsado ug walay pagduha-duha nga gipusil ang biktima.
Kahinumduman nga nagpadangat karon ug pahasubo ang mga kaubanan sa buhat ni Dinoy dungan sa paglaum nga mahatag gilayon kaniya ang hinanali nga hustisya.
Ilado ang nahisgutan nga nagapangatake sa iyang mga programa hinungdan nga wala sab gipadaplin karon sa otoridad nga usa kini sa mga motibo sa krimen.
Paningkamutan karon sa otoridad nga mahatagan ug kasulbaran ang kamatayon sa biktima ug mapatubag ang mga posibleng mipaluyo sa pagpatay niini.
