Gibutyag sa Philippine National Police (PNP) nagpakatag sila og inisyal nga pwersa nga naglangkob sa 3,000 ka mga pulis sa nagkalain-laing lugar sa Quezon City isip kabahin sa preparasyon sa ika-upat nga State of the Nation Address (SONA) ni Pangulong Ferdinand Marcos Jr. karung adlawa.
Matud ni PNP spokesperson Police Brigadier General Jean Fajardo nga andam na usab naka-skeletal deployment sa ilang mga personahe Gikadugang pa niini nga ang full deployment sa kapulisan ipatuman na sa kaadlawon sa Hulyo 28.
Gibanabana nga 12,000 ka mga pulis ang buot ipakatag aron masiguro ang seguridad sa adlaw sa SONA.
Gipakatag na usab ang pipila ka mga sakop sa PNP sa Commonwealth Avenue sa miaging Sabado, diin muagi ang presidential convoy ug daghang demonstrasyon ang gilauman nga ipahigayon. Gipatuman na usab ang mga anti-criminality measures, lakip na ang mga police checkpoints ug Task Force Manila Shield aron pugngan ang posibleng hulga sa kalinaw ug seguridad.
Sa pagkakaron, walay hulga nga natumbok nga may kalabutan sa SONA.
Samtang suspendido ang klase sa tanang lebel sa pampubliko ug pribado sa Quezon City ug ipatuman ang liquor ban sa syudad karong Hulyo 28 aron malikayan ang kasamok ug mapadayon ang kahapsay sa selebrasyon.
Nagpabilin nga alerto ang PNP ug ang uban pang security agencies aron masiguro ang kahapsay ug malinawon ang SONA sa pangulo.
