DAVAO CITY – Magpahigayon karung adlawa ang Joint Task Force Haribon (JTFH) ug military simulation exercise sa Sta. Ana Wharf aron masulayan ang katakos ug kaandam sa mga tropa kung paunsa niini masolusyonan ang hagit sa seguridad ug bahad sa terorismo.
Matud pa kang JTH Commander Gilbert Gapay, nakapahigayon na sila ug pagbansay kalabot sa tukma nga pagpatuman sa mga taktika nga mamahimong himuon atol mismo sa aktwal nga scenario.
Laraw sab sa maong aktibidad nga mapalambo pa ang teamwork sa kasundalohan ug component units kung paunsa mahimoan ug lakang ang mga insidente nga mahitabo sa siyudad.
Pinaagi sa maong aktibidad, masayran sab kung paunsa mapatuman ang naval, air, ug land security measures aron mapugngan ang mga lawless armed group.
Ang task force usa ka anti-terror component sa Eastern Mindanao Command nga nagsugod kaniadtong Oktubre 22, 2016 aron nga mapalapdan pa ang ilang operasyon sa pagsiguro sa seguridad sa Davao region, ilabi na dinhi sa siyudad nga nahimo ng alternatibo nga lugar alang National Government.
