DAVAO CITY – Gihan-ay na karon sa kapulisan ug kasundalohan ang komprehensibong diskarte sa seguridad aron nga malikayan ang bisan unsa man nga pagpangatake sa rehiyon nga hinimoan sa mga teroristang grupo.
Matud pa kang Chief Supt. Manuel Gaerlan, director sa Police Regional Office (PRO) XI, nga gi-presenta na matud pa nila ang plano aron magpahimutang ug control points sa mga strategic areas nga adunay presensiya sa mga rebeldeng grupo.
Usa sab sumala pa sa bantayan sa kasundalohan ang mga truck nga nagkarga ug pinutol nga mga kahoy nga mosubay sa border control point diin mamahimong kaabag nila sa pagsubay niini ang ahensiya sa Department of Environment and Natural Resources.
Magpahimutang sab sumala pa sila ug tourism desk aron masiguro nga matubag ang pangutana sa mga turista.
Gikanayon sab ni Brig. Gen. Gilbert Gapay, tigpamaba sa Martial Law in Eastern Mindanao Command (EastMinCom), nga nakiglambigit na sab sila sa ilang Malaysian ug Indonesian counterparts aron nga mapalig-on pa ang maritime security ingon man intelligence exchanges aron nga mamonitor kadtong mga gikatahapan nga mga terorista.
