Nadakpan ang usa ka opisyal sa barangay atol sa gilusad nga drug buy-bust operation pasado alas 10:00 sa buntag niadtong Marso 24. Gipahigayon ang operasyon sa Purok Matinabangon C, Barangay Kingking, Pantukan, Davao de Oro. Gipangunahan ang nasampit nga operasyon sa Provincial Drug Enforcement Unit, uban sa Pantukan Municipal Police Station ug Provincial Intelligence Unit, nga nakigkoordinar sa Philippine Drug Enforcement Agency (PDEA).
Giila ang suspek, nga si Alyas Mark,45-anyos nga kapitan sa barangay nga giila isip usa ka high-value individual (HVI),ug nakuhaan sumala pa og iligal nga droga kon shabu. Nakumpiska usab ang kantidad sa kwarta nga gigamit sa buy-bust operation, drug paraphernalia, ug usa ka kolor gray nga Suzuki minivan.
Gipahigayon usab ang inventory sa mga nakumpiska nga iligal nga droga. Kasong pagsupak Sections 5, 11, ug 12 sa Republic Act 9165 ang ipasaka batok sa dinakpan. Gumikan niini nagpahimangno ang Davao de Oro Police Provincial Office sa publiko nga walay exempted sa balaod. Samtang gipasalig niini nga magpabiling lig-on ang kampanya niini batok sa iligal nga droga pinaagi sa tabang sa komunidad.
Wala usab gikabutyag sa mga otoridad ang gibug-aton sa iligal nga droga ingon man ang kinatibuk-an nga kantidad niini.
Samtang sa laing bahin, giisip sa mga taga Baranggay Tambungon nga pulitika sumala pa ang nagpaluyo sa pag-aresto sa ilahang Kapitan. Giila sa mga supporters ang nadakpan nga Kapitan nga usa ka buotan og walay bisyo sumala pa niini. Samtang gikwestyon usab sa mga supporters ang gihimong pagsikop sa mga otoridad ngadto sa Baranggay Kapitan.
