Patay ang usa ka Barangay Captain nga si Isabelo D. Masiwil II ug duha kauban ang samaran human gipusil sa grupo sa mga armadong lalaki sa Barangay Tubalan, Malita, Davao Occidental alas 3:20 sa hapon niadtong Agosto 30, 2025.
Base sa imbestigasyon, niadtong alas 2:40 sa hapon, miabot si Kapitan Masiwil sa Tubalan Elementary School aron ipanghatag ang suweldo sa iyang mga trabahante nga nagtukod sa bag-ong eskwelahan. Apan kalit lang mitumaw ang upat ka wala mailhing armadong lalaki ug gipamusil sila Masiwil, uban ang iyang bodyguard nga si Ben Opong ug trabahante nga si Eti Molao.
Si Kapitan Masiwil daling nakabsan sa iyang kinabuhi tungod sa naangkon nga samad pinusilan, samtang si Opong ug Molao nasamdan ug giluwas dayon sa Digos City alang sa pagtambal. Human sa insidente, gikatahong gidala sa mga suspek ang kapin-kulang P500,000 nga giandam para sa suweldo sa mga trabahante ug mikalagiw sa wala mailhing direksyon.
Kabahin niini, hilabihan ang kasubo sa pamilya sa biktima tungod sa kalit nga pagpanaw niini, ingon man hustisya nalamang ang gipangayo sa mga kabanay ug pamilya sa biktima tungod dili na mauli ang kinabuhi sa ilang pinalanggang Kapitan.
Gani, padayon pa nga ginaimbestigahan sa kapulisan ang maong insidente, aron matumbok ang responsable og masayran ang dugang pang detalye ug motibo sa pagpatay.