Kapin tunga sa milyon nga shabu, nakumpiska sa buybust sa Tagum

Kapin sa tunga sa milyon ang nakumpiska nga gituohan nga iligal nga droga kon shabu ang nakumpiska sa duha ka mga suspetsado atol sa gilusad nga drug buybust operation.

Subay sa report sa mga otoridad, giila ang mga dinakpan nga sila alyas “Arnold” 33 anyos, usa ka marketing sales agent ug alyas “Julian, 50 anyos.

Gilusad ang operasyon sa Purok 7, Brgy.Apokon, Tagum City pasado alas Sais sa buntag.

Nakumpiska sa mga dinakpan ang 16 ka mga nagkadaiyang gidak-on nga pakete sa shabu nga mitimbang og 80 gramos ug gibana-banaan nga nagkantidad og P544,000 ang standard drug price.

Sa pagkakaron, ang mga dinakpan ang anaa na sa kostudiya sa kapulisan sa Tagum samtang gipasakahan na kini og kaso nga pagsupak sa RA 9165.