DAVAO CITY – Gikatala sa Davao City gikan Enero hangtud Mayo ning tuiga ang nasa 3,516 ka mga disgrasya sa kadalanan, diin sagad niini gikalambigitan sa 1,386 ka mga private owned vehicles ug 638 ka mga motorsiklo.
Samtang, nasa 632,775 ang natalang traffic violations.
Tungod niini, manguna ang Davao City Traffic and Transportation Management Office kon CTTMO sa paglusad sa mga aktibidad dinhi sa dakbayan atol sa Road Safety Month.
Gikanayon ni CTTMO Head Dionisio Abude, buot ipasayod karong bulana ang pagkamahinungdanon sa pagsunod sa mga balaod trapiko alang sa kaluwasan sa mga drayber, operator, pasahero lakip mga pedestrians sa syudad.
Nasayod ang buhatan nga kasagaran sa mga disgrasya, mahitabo gumikan sa pagpasagad sa tawo sa pagmaneho, overspeeding, paggamit og cellphone samtang nagmaneho, ug ilawom sa impluwensya sa droga o ilimnong makahubog.
Dugang pa ni Abude nga importante sab ang pagbaton ug maayong kondisyon sa usa ka drayber alang sa tukmang focus sa pagmaneho.
Ilawom sa Presidential Proclamation No. 115-A ang pagdeklara sa bulan sa Mayo isip Road Safety Month aron subling mapahinumduman ang mga drabyer ug motorista alang sa responsable ug luwas nga pagmaneho sa kadalanan.
via || Bombo LJF
