Gipasigarbo ni Deputy Gab Nakan, ang hepe sa Davao City Muslim Affairs, ang malampusong pagkolekta og P32,293.75 nga donasyon gikan sa Sadaqa Box isip bahin sa Eid’l Fitr 2025. Giablihan ug giihap ang kahon uban sa mga saksi, isip porma sa transparency sa ilang buhat.
Matod sa opisyal nga Facebook post ni Deputy Nakan, ang maong pondo gikan sa mga buotan nga donors nga mitampo sa ilang kalihokan. Gikatakda kining gamiton alang sa mga Muslim Eid programs, ug plano usab sa ilang grupo nga magpundar og sound system, LED display, ug uban pang kagamitan nga magpabibo sa mga umaabot nilang kalihokan.
Mitimbaya si Deputy Nakan ug mapasalamaton niyang gidayeg ang suporta sa tanang katawhan, ilabi na ang mga miyembro sa Muslim community. Gisaludohan usab niya ang kalampusan sa PABUKA 2025 nga gilusad niadtong Abril 7, 2025, nga gitambungan sa kapin 1,000 ka miyembro sa nagkadaiyang tribu ug sektor sa Muslim Community sa Davao City.
