Gipahigayon ang usa ka malampusong buy-bust operation sa Digos City niadtong Mayo 4, 2025, nga mitultol sa pag-aresto sa unom (6) ka indibidwal nga nalambigit sa pagpamaligya ug pagpanag-iya og smuggled nga sigarilyo.
Ang operasyon gipasiugdahan sa Police Regional Office 11 (PRO 11) ug Digos City Police Station (CPS), uban ang kooperasyon sa Criminal Investigation and Detection Group (CIDG) Davao del Sur Provincial Field Unit (DSPFU).
Nahuman ang operasyon alas 4:30 sa hapon sa ilawom sa Project Plan Mega Shopper sa CIDG, nga nagtumong sa mga kalapasan sa Republic Act 10643 o ang Graphic Health Warnings Law.
Nadakpan sa akto ang mga suspek nga nagabaligya og sigarilyo nga walay health warning label ngadto sa usa ka pulis nga poseur buyer.
Giila ang mga dinakpan pinaagi sa ilang mga alyas nga sila si “Anda,” “Sam,” “Amir,” “Nad,” “Mar,” ug “Jake.” Gikumpiskar sa mga otoridad ang usa ka master case sa President (red) nga sigarilyo, usa ka tinuod nga P1,000 nga marked money, ug 14 ka piraso sa boodle money.
Lakip usab sa mga nakuha mao ang 262 ka master cases sa President (red) ug 216 ka master cases sa Aris (white ug black) nga sigarilyo nga walay health warnings.
Gisakmit usab ang usa ka puti nga Isuzu Travis L3 van ug pula nga container van. Samtang ang kinatibuk-ang kantidad sa nakumpiskar nga mga sigarilyo gibanabana nga moabot sa P19.1 milyon.
Samtang ang maong operasyon giila sa CIDG isip dakong hagit sa underground trade sa sigarilyo sa rehiyon ug nagpakita sa determinasyon sa mga otoridad nga pugngan ang paglapas sa balaod ug protektahan ang panglawas sa publiko.
