Nakab-ot sa Davao City Police Office (DCPO) ang laing dakong kalampusan sa ilang pinalig-ong kampanya batok sa illegal nga droga, human madakpan ang usa ka High-Value Individual (HVI) ug nakumpiska ang kapin ₱1.04 milyon pesos nga kantidad sa gituohang marijuana ug liquid marijuana atol sa usa ka malampusong buy-bust operation sa Purok 27, Padaman Riverside, Barangay Maa, Davao City, alas 3:13 sa hapon kagahapong adlawa, Disyembre 30, 2025.
Atol sa operasyon, nadakpan si alias “Boss,” 25 anyos,bosing coach nga giila isip High-Value Individual ug priority drug target sa DCPO, ug si alias “Kirby,” 30 anyos, nga giklasipikar isip Street-Level Individual (SLI).
Ang duha ka suspek mga residente sa Punta Dumalag 1, Barangay Matina Aplaya, Davao City.
Gipangunahan ang operasyon sa City Drug Enforcement Unit (CDEU) ug City Special Operations Group (CSOG) ubos sa pagpanguna ni PLTCOL Randy P. Sambalod, kauban ang mga operatiba sa PS16-Maa.
Nakumpiska sa buy-bust ang gituohang marijuana nga nagkantidad og ₱120,000, ug kapin liquid marijuana nga nagkantidad og ₱925,000.
Lakip sa mga nakuha nga ebidensya ang high-grade nga uga nga dahon sa marijuana ug fruiting tops, daghang kahon sa high-potency disposable vape pens nga adunay gituohang liquid marijuana sa lain-laing mga flavor, buy-bust money, mga cellphone, mga bag, usa ka Yamaha Mio nga motorsiklo uban ang helmet, ug uban pang drug-related paraphernalia.
Sa iyang pamahayag, gipasiugda ni PCOL Mannan Caracas Muarip, Acting City Director sa DCPO, nga ang pagdakop kang alias “Boss” usa ka dakong kalampusan ug breakthrough sa kampanya sa siyudad batok sa illegal nga droga.
